ಕಣ್ಣು ತೆಗೆಯುವ ಮುನ್ನವೇ ತಂದೆಯನ್ನು ಕಳೆದುಕೊಂಡ ಮಗು…
ನವಜಾತ ಶಿಶುವಿನ ಕೈಯಲ್ಲಿ ಸೈನಿಕನ ಅಂತ್ಯಸಂಸ್ಕಾರ**
ಗರ್ಭಿಣಿ ಪತ್ನಿ ಹೆರಿಗೆ ಕೊಠಡಿಯಲ್ಲಿ – ಗಂಡ ಚಿತೆಯಲ್ಲಿ;
ಸಾತಾರಾದಲ್ಲಿ ಕರುಳು ಕಿತ್ತುಹೋಗುವ ದೃಶ್ಯ.
ಸಾತಾರಾ (ಮಹಾರಾಷ್ಟ್ರ):
ರಜೆ ಮೇಲೆ ಮನೆಗೆ ಬಂದಿದ್ದ ಭಾರತೀಯ ಸೇನೆಯ ಯೋಧ ಪ್ರಮೋದ್ ಜಾಧವ್ ಅವರ ಬದುಕು ಒಂದು ಕ್ಷಣದಲ್ಲಿ ರಸ್ತೆಯ ಮೇಲೆಯೇ ಮುಗಿದು ಹೋಯಿತು. ಆದರೆ ಅವರ ಬದುಕಿನ ಮುಂದುವರಿದ ಅಧ್ಯಾಯ… ಆಸ್ಪತ್ರೆಯ ಹೆರಿಗೆ ಕೊಠಡಿಯಲ್ಲಿ ಬರೆಯಲ್ಪಟ್ಟಿತು.
ಸಾತಾರಾ ಜಿಲ್ಲೆಯ ಪಾರ್ಲಿ ಗ್ರಾಮದಲ್ಲಿ ಸಂಭವಿಸಿದ ರಸ್ತೆ ಅಪಘಾತದಲ್ಲಿ ಪ್ರಮೋದ್ ಜಾಧವ್ ಸಾವಿಗೀಡಾದ ಕೆಲವೇ ಗಂಟೆಗಳ ಬಳಿಕ, ಅವರ ತುಂಬು ಗರ್ಭಿಣಿ ಪತ್ನಿ ಹೆಣ್ಣು ಮಗುವಿಗೆ ಜನ್ಮ ನೀಡಿದರು.
ಒಂದು ಕಡೆ ಆಸ್ಪತ್ರೆಯಲ್ಲಿ ಮಗುವಿನ ಅಳುವಿನ ಧ್ವನಿ… ಇನ್ನೊಂದು ಕಡೆ ಶ್ಮಶಾನದಲ್ಲಿ ಸೈನಿಕನ ಚಿತೆಯ ಉರಿಯುವ ಬೆಂಕಿ… ಈ ಎರಡು ದೃಶ್ಯಗಳು ಒಂದೇ ದಿನದಲ್ಲಿ ನಡೆದವು.
ಕೈ ಹಿಡಿದು ನೋವು ಆಲಿಸಬೇಕಿದ್ದ ಗಂಡ – ಚಿತೆಯ ಮೇಲೆ ಮಲಗಿದ್ದ
ಮೊದಲ ಮಗುವಿನ ನಿರೀಕ್ಷೆಯಲ್ಲಿ ಇದ್ದ ಆ ಯುವತಿಯ ಕೈ ಹಿಡಿದು, “ಭಯಪಡಬೇಡ” ಎಂದು ಧೈರ್ಯ ಹೇಳಬೇಕಿದ್ದ ಗಂಡ, ಆ ಕ್ಷಣದಲ್ಲಿ ರಾಷ್ಟ್ರಧ್ವಜ ಹೊದಿಸಿದ ಶವವಾಗಿ ಮಲಗಿದ್ದ.
ತಂದೆಯಾಗಬೇಕಿದ್ದ ಸೈನಿಕನಿಗೆ ತನ್ನ ಮಗಳ ಮುಖ ನೋಡಲು ವಿಧಿಯೇ ಅವಕಾಶ ನೀಡಲಿಲ್ಲ.
ಕಣ್ಣು ಬಿಡದ ಮಗಳ ಜೊತೆ ಅಂತ್ಯಸಂಸ್ಕಾರ
ಹೆರಿಗೆ ನೋವಿನಲ್ಲೇ ನರಳುತ್ತಿದ್ದ ಆ ತಾಯಿ, ಕೆಲವೇ ಗಂಟೆಗಳ ಬಳಿಕ ಕಣ್ಣು ಕೂಡ ತೆರೆಯದ ನವಜಾತ ಶಿಶುವನ್ನು ಮಡಿಲಲ್ಲಿ ಹಿಡಿದುಕೊಂಡು ಗಂಡನ ಅಂತಿಮ ಸಂಸ್ಕಾರಕ್ಕೆ ಬಂದಳು.
ತಂದೆಯ ಶವದ ಮುಂದೆ ನಿಂತಿದ್ದ ಆ ಮಗು, ತಾನು ಯಾರನ್ನು ಕಳೆದುಕೊಂಡಿದ್ದಾಳೆ ಎಂಬುದೂ ಅರಿಯದ ವಯಸ್ಸಿನಲ್ಲಿತ್ತು.
ಶ್ಮಶಾನದಲ್ಲಿ ಸೇರಿದ್ದವರ ಕಣ್ಣುಗಳು ತೇವಗೊಂಡವು.
“ಜಗತ್ತನ್ನೇ ನೋಡದ ಈ ಮಗು ಯಾವ ಪಾಪ ಮಾಡಿತ್ತು?” ಎಂಬ ಮೌನ ಪ್ರಶ್ನೆ ಎಲ್ಲರ ಹೃದಯವನ್ನೂ ತಿವಿದಿತು.
ರಾಷ್ಟ್ರಕ್ಕಾಗಿ ಬದುಕಿದ ಯೋಧ…
ಕುಟುಂಬಕ್ಕಾಗಿ ಬದುಕಬೇಕಿದ್ದ ಗಂಡ…
Mಮಗುವಿಗೆ ತಂದೆಯಾಗಬೇಕಿದ್ದ ವ್ಯಕ್ತಿ…
ಮೂರು ಪಾತ್ರಗಳನ್ನು ಒಂದೇ ದಿನದಲ್ಲಿ ಕಳೆದುಕೊಂಡ ಆ ಮನೆಗೆ, ಈಗ ಉಳಿದಿದ್ದು ಒಂದು ಮೌನ, ಒಂದು ನವಜಾತ ಜೀವ ಮತ್ತು ಮುಗಿಯದ ನೋವು ಮಾತ್ರ.
