ಜಾಗತಿಕ ಹಸಿರು ಹಾದಿಗೆ ಬೆಳಗಾವಿ ದಿಟ್ಟ ಹೆಜ್ಜೆ

ಸಿಟೀಸ್ 2.0’ ಅಡಿ ಜೈಪುರ ಮಾದರಿ ಅಧ್ಯಯನಕ್ಕೆ ಪಾಲಿಕೆ ತಂಡ – ಕಸದ ಸಮಸ್ಯೆಗೆ ವೈಜ್ಞಾನಿಕ ಪರಿಹಾರ ಹುಡುಕಾಟ

ಶಾಶ್ವತ ನಗರಾಭಿವೃದ್ಧಿಯತ್ತ ಮಹತ್ವದ ಹೆಜ್ಜೆ

■ ಜಾಗತಿಕ ಸಹಭಾಗಿತ್ವದ ‘ಸಿಟೀಸ್ 2.0’ ಯೋಜನೆ

■ ಜೈಪುರದಲ್ಲಿ ಆಧುನಿಕ ಕಸದ ನಿರ್ವಹಣಾ ವ್ಯವಸ್ಥೆಗಳ ವೀಕ್ಷಣೆ

■ ಹೆಚ್ಚುತ್ತಿರುವ ಘನತ್ಯಾಜ್ಯಕ್ಕೆ ವೈಜ್ಞಾನಿಕ ಪರಿಹಾರ ಹುಡುಕಾಟ

■ ಫಲಿತಾಂಶಾಧಾರಿತ ಅನುಷ್ಠಾನಕ್ಕೆ ಕೇಂದ್ರದ ಒತ್ತು
■ ಸ್ಥಳೀಯ ಅನುಭವದಿಂದ ಅಂತರರಾಷ್ಟ್ರೀಯ ಮಾನದಂಡಗಳತ್ತ ದೃಷ್ಟಿ

■ ವಾರ್ಡ್ ಮಟ್ಟದಲ್ಲಿ ಪೈಲಟ್ ಯೋಜನೆ ಸಿದ್ಧತೆ
■ ‘ಅನುಷ್ಠಾನ’ವೇ ನಗರ ಆಡಳಿತದ ನಿಜ ಪರೀಕ್ಷೆ

ಬೆಳಗಾವಿ
ಶಾಶ್ವತ ನಗರಾಭಿವೃದ್ಧಿಯ ಹಾದಿಯಲ್ಲಿ ಬೆಳಗಾವಿ ಮಹತ್ವದ ತಿರುವು ಪಡೆದುಕೊಂಡಿದೆ. ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷಿ ‘ಸಿಟೀಸ್ 2.0’ ಯೋಜನೆಯಡಿ ಆಯ್ಕೆಯಾದ ನಗರಗಳ ಪೈಕಿ ಬೆಳಗಾವಿಯೂ ಸ್ಥಾನ ಪಡೆದಿರುವುದು ನಗರ ಆಡಳಿತಕ್ಕೆ ಹೊಸ ಆತ್ಮವಿಶ್ವಾಸ ತುಂಬಿದೆ.

ಫ್ರೆಂಚ್ ಡೆವಲಪ್ಮೆಂಟ್ ಏಜೆನ್ಸಿ (AFD) ಹಾಗೂ ಯುರೋಪಿಯನ್ ಯೂನಿಯನ್ ಸಹಭಾಗಿತ್ವದ ಈ ಯೋಜನೆ, ಘನತ್ಯಾಜ್ಯ ನಿರ್ವಹಣೆ ಮತ್ತು ವಾಯು ಗುಣಮಟ್ಟ ಸುಧಾರಣೆಯಲ್ಲಿ ಜಾಗತಿಕ ಮಾನದಂಡಗಳನ್ನು ಅಳವಡಿಸುವತ್ತ ಗಮನಹರಿಸಿದೆ.ಹಿರಿಯ

ಈ ಹಿನ್ನೆಲೆಯಲ್ಲಿ ಮೇಯರ್ ಮಂಗೇಶ ಪವಾರ್ ಹಾಗೂ ಉಪಮೇಯರ್ ವಾಣಿ ಜೋಶಿ ನೇತೃತ್ವದ ಬೆಳಗಾವಿ ಮಹಾನಗರ ಪಾಲಿಕೆ ತಂಡ ಜೈಪುರದಲ್ಲಿ ಅಧ್ಯಯನ ಪ್ರವಾಸ ಕೈಗೊಂಡಿದೆ. ಜೈಪುರದ ಆಧುನಿಕ ಘನತ್ಯಾಜ್ಯ ಸಂಸ್ಕರಣೆ ಘಟಕಗಳು, ಮೆಟೀರಿಯಲ್ ರಿಕವರಿ ಫೆಸಿಲಿಟಿಗಳು (MRF), ವೈಜ್ಞಾನಿಕ ಕಂಪೋಸ್ಟಿಂಗ್ ವ್ಯವಸ್ಥೆಗಳು ಮತ್ತು ವಾಯು ಶುದ್ಧೀಕರಣ ಕ್ರಮಗಳ ಕಾರ್ಯವೈಖರಿಯನ್ನು ತಂಡ ಸಮಗ್ರವಾಗಿ ವೀಕ್ಷಿಸಿದೆ.

ಕಸದ ಸಮಸ್ಯೆಗೆ ಹೊಸ ಸಮೀಕರಣ
ನಗರದಲ್ಲಿ ದಿನೇದಿನೇ ಹೆಚ್ಚುತ್ತಿರುವ ಕಸದ ಪ್ರಮಾಣ, ಸೀಮಿತ ಲ್ಯಾಂಡ್‌ಫಿಲ್ ಜಾಗ ಮತ್ತು ಮಾಲಿನ್ಯ ಸವಾಲುಗಳು ಆಡಳಿತಕ್ಕೆ ತಲೆನೋವಾಗಿವೆ. ‘ಸಿಟೀಸ್ 2.0’ ಯೋಜನೆ ಅನುದಾನ ಮಾತ್ರವಲ್ಲ, ಫಲಿತಾಂಶಾಧಾರಿತ ಅನುಷ್ಠಾನಕ್ಕೆ ಒತ್ತು ನೀಡುವ ಮಾದರಿಯಾಗಿದೆ.

“ಇದು ಪ್ರವಾಸವಲ್ಲ, ಕಲಿಕೆಯ ಅವಕಾಶ. ಬೆಳಗಾವಿಯ ಪರಿಸ್ಥಿತಿಗೆ ಹೊಂದುವಂತೆ ಜೈಪುರ ಮಾದರಿಯನ್ನು ರೂಪಾಂತರಿಸುವ ದಿಸೆಯಲ್ಲಿ ಚರ್ಚೆಗಳು ನಡೆಯುತ್ತಿವೆ,” ಎಂದು ಮೇಯರ್ ಮಂಗೇಶ ಪವಾರ್ ಹೇಳಿದ್ದಾರೆ.

ಸ್ಥಳೀಯದಿಂದ ಜಾಗತಿಕದತ್ತ
ಉಪಮೇಯರ್ ವಾಣಿ ಜೋಶಿ, “ಇಂದೋರ್ ಮತ್ತು ಚಂಡೀಗಢ ಮಾದರಿಗಳನ್ನು ಅಧ್ಯಯನ ಮಾಡಿದ್ದೇವೆ. ಈಗ ಜೈಪುರದ ಜಾಗತಿಕ ದೃಷ್ಟಿಕೋನವನ್ನು ಅರ್ಥೈಸುತ್ತಿದ್ದೇವೆ,” ಎಂದು ವಿವರಿಸಿದರು.

ಆಡಳಿತ ಪಕ್ಷದ ನಾಯಕ ಹನುಮಂತ ಕೋಂಗಾಲಿ “ಇನ್ನು ಹೋಲಿಕೆಗಳು ರಾಜ್ಯಮಟ್ಟದಲ್ಲಲ್ಲ; ಅಂತರರಾಷ್ಟ್ರೀಯ ಮಾನದಂಡಗಳತ್ತ ನಮ್ಮ ದೃಷ್ಟಿ. ಸ್ವಚ್ಛತೆ, ಹವಾಮಾನ ಸಹಿಷ್ಣುತೆ ಮತ್ತು ಪಾರದರ್ಶಕತೆ ನಮ್ಮ ಆದ್ಯತೆ,” ಎಂದರು.
ಪೈಲಟ್ ಯೋಜನೆ – ವಾರ್ಡ್ ಮಟ್ಟದಿಂದ ನಗರಮಟ್ಟಕ್ಕೆ
ಜೈಪುರ ಮಾದರಿಯನ್ನು ಮೊದಲಿಗೆ ಆಯ್ದ ವಾರ್ಡ್‌ಗಳಲ್ಲಿ ಪೈಲಟ್ ಆಧಾರದಲ್ಲಿ ಜಾರಿಗೆ ತರುವ ಪ್ರಸ್ತಾವನೆಯಿದೆ. ಅಧ್ಯಯನ ವರದಿ ಸಲ್ಲಿಕೆಯ ಬಳಿಕ ಹಂತ ಹಂತವಾಗಿ ನಗರಮಟ್ಟಕ್ಕೆ ವಿಸ್ತರಿಸುವ ಕಾರ್ಯಯೋಜನೆ ರೂಪುಗೊಳ್ಳಲಿದೆ ಎಂದು ಮೂಲಗಳು ತಿಳಿಸಿವೆ.
‘ಅನುಷ್ಠಾನ’ವೇ ಪರೀಕ್ಷೆ
ಮಹಾನಗರ ಪಾಲಿಕೆ, ಸ್ಮಾರ್ಟ್ ಸಿಟಿ ಮಿಷನ್ ಹಾಗೂ ಅಂತರರಾಷ್ಟ್ರೀಯ ಸಂಸ್ಥೆಗಳ ಸಹಯೋಗದ ಈ ಯೋಜನೆ, ನಗರ ಆಡಳಿತದಲ್ಲಿ ಸಮಗ್ರ ಬದಲಾವಣೆಯ ಸಂಕೇತವಾಗಿದೆ.
ಆದರೆ ಇದೀಗ ಪ್ರಶ್ನೆ ಒಂದೇ—ಅಧ್ಯಯನದ ಅನುಭವಗಳು ಅನುಷ್ಠಾನದಲ್ಲಿ ಎಷ್ಟು ಪ್ರತಿಫಲಿಸುತ್ತವೆ?
ಜೈಪುರ ಅಧ್ಯಯನದ ನಂತರ ಬೆಳಗಾವಿ ರೂಪಿಸಬಹುದಾದ ಕಾರ್ಯಯೋಜನೆಗೆ ನಾಗರಿಕರ ನಿರೀಕ್ಷೆಗಳು ಗರಿಷ್ಠ ಮಟ್ಟಕ್ಕೇರಿವೆ. ಹಸಿರು ಭವಿಷ್ಯದ ಕನಸು ಈಗ ಆಡಳಿತದ ಕೈಯಲ್ಲಿದೆ.