ಸಿಟೀಸ್ 2.0 ಮೇಲೆ ರಾಜ್ಯದ ನಿರ್ಧಾರವೇ ಸಂಕಟ?.

ಸ್ಮಾರ್ಟ್ ಸಿಟಿ ಕಂಪನಿ ಮುಚ್ಚಿದರೆ ಬೆಳಗಾವಿಯ ಅವಕಾಶಕ್ಕೂ ಕತ್ತರಿ: ಕೇಂದ್ರದ ಖಡಕ್ ಎಚ್ಚರಿಕೆ.

ಸಿಟೀಸ್ 2.0 ಉಳಿಸಬೇಕೆಂದರೆ ಸ್ಮಾರ್ಟ್ ಸಿಟಿ ಕಂಪನಿ ಉಳಿಯಲಿ; ಇಲ್ಲದಿದ್ದರೆ ಬದಲಿ ನಗರ: ಕೇಂದ್ರದ ಖಡಕ್ ಎಚ್ಚರಿಕೆ.

ಸಂಸ್ಥೆ ಮುಚ್ಚುವ ಆತುರ ಏಕೆ? ಬೆಳಗಾವಿಯ ಅವಕಾಶದ ಮೇಲೆ ಯಾರ ಕಣ್ಣು?

ಬೆಳಗಾವಿ:
ಬೆಳಗಾವಿ ಸ್ಮಾರ್ಟ್ ಸಿಟಿ ಲಿಮಿಟೆಡ್‌ನ್ನು ಮುಚ್ಚಲು ರಾಜ್ಯ ಸರ್ಕಾರ ಮುಂದಾಗಿರುವ ವಿಚಾರಕ್ಕೆ ಕೇಂದ್ರ ಸರ್ಕಾರವೇ ಈಗ ಕಠಿಣ ತಡೆ ನೀಡಿದಂತಾಗಿದೆ. ಸಿಟೀಸ್ 2.0 ಯೋಜನೆಯಲ್ಲಿ ಬೆಳಗಾವಿ ಮುಂದುವರಿಯಬೇಕಾದರೆ, ಸ್ಮಾರ್ಟ್ ಸಿಟಿ ವಿಶೇಷ ಉದ್ದೇಶ ವಾಹನ (SPV) ಕಾರ್ಯನಿರ್ವಹಿಸಲೇಬೇಕು ಎಂದು ಸ್ಮಾರ್ಟ್ ಸಿಟೀಸ್ ಮಿಷನ್ ಅಪೆಕ್ಸ್ ಸಮಿತಿ ಸ್ಪಷ್ಟಪಡಿಸಿದೆ. ಇಲ್ಲವಾದರೆ, ಬೆಳಗಾವಿಯ ಬದಲಿಗೆ ಮತ್ತೊಂದು ನಗರವನ್ನು ಸೇರಿಸುವ ಅವಕಾಶವಿದೆ ಎಂಬ ಸಂದೇಶವೂ ದಾಖಲಾಗಿದೆ.

ಡಿ.23, 2025ರಂದು ನಡೆದ ಅಪೆಕ್ಸ್ ಸಮಿತಿ ಸಭೆಯಲ್ಲಿ ಕರ್ನಾಟಕ ಸರ್ಕಾರದ ಬೆಳಗಾವಿ ಸ್ಮಾರ್ಟ್ ಸಿಟಿ ಲಿಮಿಟೆಡ್ ಮುಚ್ಚುವ ಮನವಿ ಪ್ರತ್ಯೇಕ ಅಜೆಂಡಾವಾಗಿಯೇ ಚರ್ಚೆಗೆ ಬಂದಿದೆ. ಸಭೆಯಲ್ಲಿ ಬೆಳಗಾವಿ ಸಿಟೀಸ್ 2.0ಗೆ ಆಯ್ಕೆಯಾದ 18 ನಗರಗಳಲ್ಲಿ ಒಂದು ಎಂದು ಉಲ್ಲೇಖಿಸಿ, AFD, KfW ಹಾಗೂ ಯುರೋಪಿಯನ್ ಯೂನಿಯನ್ ನೆರವಿನ ಈ ಯೋಜನೆ ಚತುಷ್ಪಕ್ಷೀಯ ಒಪ್ಪಂದದಡಿ ಜಾರಿಯಲ್ಲಿರುವುದರಿಂದ SPV ಕಡ್ಡಾಯ ಎಂದು ತಿಳಿಸಲಾಗಿದೆ.

ಇದರಿಂದ ಪ್ರಶ್ನೆ ನೇರವಾಗಿದೆ: ರಾಜ್ಯ ಸರ್ಕಾರಕ್ಕೆ ಬೆಳಗಾವಿಯ ಮುಂದಿನ ಹಂತದ ಅಭಿವೃದ್ಧಿ ಮುಖ್ಯವೇ, ಅಥವಾ ಸ್ಮಾರ್ಟ್ ಸಿಟಿ ಕಂಪನಿ ಮುಚ್ಚುವುದೇ ಮುಖ್ಯವೇ?
SPVಗೆ ಬೀಗ ಹಾಕಿದರೆ, ಬೆಳಗಾವಿಯ ಸಿಟೀಸ್ 2.0 ಕನಸಿಗೂ ಬೀಗ ಬೀಳುವ ಅಪಾಯ ಇದೀಗ ಸ್ಪಷ್ಟವಾಗಿದೆ.